Yn hanes Eugene Onegin, ar daith o 24ain o Chwefror, nid yw cwrs gwir gariad yn rhedeg yn llyfn o gwbl! Fodd bynnag, i Stephanie Windsor-Lewis, sy’n canu rhan Larina yn ein cynhyrchiad, mae cysylltiad rhamantaidd arbennig iawn i’r opera.
Mae Stephanie, a ganodd ran Olga yng nghynhyrchiad ein Cyfarwyddwyr Artistig Jonathan a Richard o’r sioe i’r Opera Project, yn mynd i’r afael â rhan arall i OCC ac mae hi’n chwarae rhan mam Olga, Larina – mae hi’n gobeithio y caiff ‘chydig o golur rhychau a wig llwyd!
Dywedodd Stephanie wrthym:
“Fe wnes i gyfarfod fy ngŵr pan ddaeth i fy ngwylio yn chwarae rhan ‘Olga’ pan gymerais ran yn yr opera ddiwethaf gyda Richard a Jon i’r Opera Project!
Fe wnes i gwrdd â’m gŵr unwaith, fis cyn y sioe, ac fel esgus i ddod i’m gweld eto roedd eisiau gwylio sioe yr oeddwn i’n rhan ohoni. Roedd yn newydd i opera felly fe wnaeth lawer o ymchwil cyn dod er mwyn peidio ymddangos yn ddi-glem! Fe aethom ni am swper wedyn a syrthio mewn cariad ar yr olwg gyntaf fwy neu lai.”
Nid yw Stephanie, sy’n byw ger Machynlleth, yn newydd i’n lleoliadau teithio gan ei bod yn dysgu canu i sawl aelod o AberOpera a fydd yn ymuno â ni yn y corws ar gyfer y perfformiad yng Nghanolfan Gelfyddydau Aberystwyth.
Cychwynnodd gyrfa euraidd y Mezzo Stephanie gyda hyfforddiant yn Florence a Bologna ac mae hi wedi teithio ledled y byd, gan gynnwys rhan mewn cyngerdd gala yn Singapore gyda’r tenor clodfawr Josè Carreras yn ogystal â pherfformio gydag Opera Cenedlaethol Lloegr, yn y Venice Biennale a’r New York Met.
Enillodd wobrau cyntaf yng nghystadleuaeth Benvenuto Franci a chystadleuaeth Premio Crescendo yn Florence, a chyrhaeddodd rownd derfynol cystadleuaeth Ernst Haefligger yn y Swistir.
Mae hi’n edrych ymlaen at gychwyn ar ran Larina ac meddai:
“Mae Onegin yn ddarn cyfareddol. Yn gyntaf, rydw i wrth fy modd gyda’r offeryniaeth a’r harmoni cyfoethog; mae’r llinellau ysgubol ochr yn ochr â’r elfennau gwerin Rwsiaidd yn ddiddorol.”
Rydym yn cyfarfod Larina am y tro cyntaf gartref gyda’i merched, Tatyana lengar sy’n ganolbwynt stori Eugene Onegin, a’i chwaer Olga – sy’n fwy cartrefol gyda cherddoriaeth a dawnsio, yn ogystal â’i morwyn Filipyevna. Tarfir ar eu bywyd gwledig distaw pan gyrhaedda dyweddi Olga, Lensky, a’i gyfaill lluddedig Onegin – y mae Tatyana’n syrthio mewn cariad ag ef ar unwaith.
Dydw i ddim yn difetha’r plot yn ormodol drwy ddweud bod ei chariad yn cael ei wrthod gan y dihiryn sarrug – rydym yn falch fod diwedd hapusach i hanes Stephanie ei hun!
_
Gwelwch y dyddiadau ac archebwch tocynnau ar gyfer y daith o Eugene Onegin Tchaikovsky yma
